¹ Wayesengiphumisela egcekeni elingaphandle ngasenyakatho , wangingenisa ekamelweni elibhekene nendawo eyahlukanisiweyo, elimalungana nesakhiwo ngasenyakatho, ² ohlangothini olude , ubude balo buyizingalo eziyikhulu , umnyango ungasenyakatho; ububanzi babuyizingalo ezingamashumi ayisihlanu. ³ Malungana nezingalo ezingamashumi amabili ezazingezegceke elingaphakathi, namalungana nendawo egandayiweyo eyayingeyegceke elingaphandle kwakukhona umpheme malungana nompheme eyelakanyene kathathu. ⁴ Ngaphambi kwamakamelo kwakukhona indlela yokuhamba , ububanzi bayo buyizingalo eziyishumi ngaphakathi, nobude bayo b uyizingalo eziyikhulu ; iminyango yawo yayingasenyakatho. ⁵ Amakamelo aphezulu ayemafushane, ngokuba imipheme yanciphisa kulawa kunakwaphansi naphakathi esakhiweni. ⁶ Ngokuba ayelakanyene kathathu; ayengenazinsika njengezinsika zamagceke; ngalokho angaphezulu ayehlehlile kunaphansi naphakathi kusukela emhlabathini. ⁷ Ugange olwalungaphandle eceleni kwamakamelo ngasegcekeni elingaphandle babuyizingalo ezingamashumi ayisihlanu. ⁸ Ngokuba ubude bamakamelo ayesegcekeni elingaphandle babuyizingalo ezingamashumi ayisi hlanu, kepha bheka , ngaphambi kwethempeli kwakuyizingalo eziyikhulu. ⁹ Kusukela phansi kwalawa makamelo kwakukhona ukungena ngasempumalanga, lapho kwangenwa kuwo kuvelwa egcekeni elingaphandle. ¹⁰ Lapho ugange lwegceke lwaludumbile khona ngasempumalanga , ngaphambi kwendawo eyahlukanisiweyo naphambi kwesakhiwo , kwakukhona amakamelo nalapho. ¹¹ Indlela phambi kwawo yayinjengesimo seyamakamelo angasenyakatho ; ububanzi babunjengobude; izindawo zawo zokuphuma zazinjengemithetho yazo nanjengeminyango yazo. ¹² Njengeminyango yamakamelo aseningizimu kwakukhona umnyango esihlokweni sendlela , indlela malungana nogange ngasempumalanga , lapho kungenwa kuwo. ¹³ Wayesethi kimi : Amakamelo asenyakatho namakamelo aseningizimu aphambi kwendawo eyahlukanisiweyo mawabe ngamakamelo angcwele, lapho abapristi abaseduze noJehova beyakudla khona okungcwelengcwele , babeke khona okungcwelengcwele , nomnikelo wempuphu , nomnikelo wesono, nomnikelo wecala, ngokuba indawo ingcwele. ¹⁴ Lapho abapristi bengena , abayikuphuma endaweni engcwele ukuya egcekeni elingaphandle, kepha bayakubeka lapho izambatho zabo abakhonze ngazo, ngokuba bayingcwele ; bayakwembatha ezinye izingubo , basondele kulokhu okungokwabantu. ¹⁵ Lapho eseqede ukulinganisa indlu engaphakathi , wangiphumisa ngendlela yesango elingasempumalanga, walinganisa ukuzungeza. ¹⁶ Walinganisa uhlangothi lwasempumalanga ngohlanga lokulinganisa : yizinhlanga ezingamakhulu ayisihlanu ngohlanga lokulinganisa nxazonke. ¹⁷ Walinganisa uhlangothi lwasenyakatho : yizinhlanga ezingamakhulu ayisihlanu ngohlanga lokulinganisa nxazonke. ¹⁸ Walinganisa uhlangothi lwaseningizimu : yizinhlanga ezingamakhulu ayisihlanu ngohlanga lokulinganisa. ¹⁹ Wayesephendukela ohlangothini lwasentshonalanga, walinganisa izinhlanga ezingamakhulu ayisihlanu ngohlanga lokulinganisa. ²⁰ Wayilinganisa ezinhlangothini zozine ; yayinogange nxazonke , ubude balo buyizingalo ezingamakhulu ayisihlanu, nobubanzi buyizingalo ezingamakhulu ayisihlanu ukwahlukanisa phakathi kokungcwele nokungengcwele.