¹ UPilatu wayesemthatha uJesu, wamshaya. ² Amabutho aluka umqhele wameva awufaka ekhanda lakhe , amembathisa ingubo ebubende; ³ aya kuye, athi: Bayede, nkosi yabaJuda! Ammukula. ⁴ UPilatu wabuye waphuma, wathi kubo: Bhekani, ngimkhiphela kini, ukuze nazi ukuba angifumani cala kuye. ⁵ Wayesephuma uJesu ethwele umqhele wameva nengubo ebubende . Wathi kubo uPilatu: Bhekani lo muntu! ⁶ Bathi bembona abapristi abakhulu nezikhonzi , bamemeza bathi: Mbethele, mbethele esiphambanweni! UPilatu wathi kubo : Mthatheni nina, nimbethele esiphambanweni, ngokuba angifumani cala kuye. ⁷ Kepha abaJuda bamphendula bathi : Sinomthetho thina ; ngalo mthetho ufanele ukufa, ngokuba ezenzile iNdodana kaNkulunkulu. ⁸ Kuthe uPilatu ezwa lelo zwi, kwayikhona esaba kakhulu, ⁹ wabuye wangena enqabeni, wathi kuJesu : Ungowaphi wena na ? Kepha uJesu kamphendulanga. ¹⁰ Khona wathi uPilatu kuye : Awukhulumi kimi na ? Awazi ukuthi nginamandla okukukhulula , nginamandla futhi okukubethela esiphambanweni na? ¹¹ UJesu waphendula wathi : Ngabe awunamandla neze phezu kwami , ukuba awuwanikwanga ngaphezulu . Ngalokho-ke onginikele kuwe unesono esikhulu. ¹² Ngalokho uPilatu wayefuna ukumkhulula . Kepha abaJuda bamemeza bathi: Uma ukhulula lona , awusiye umhlobo kaKesari ; osuka ezenza inkosi , umelene noKesari. ¹³ Kuthe uPilatu esezwa lawo mazwi wamkhiphela ngaphandle uJesu; wahlala esihlalweni sokwahlulela endaweni ethiwa eGandaywe ngamatshe kodwa ngesiHeberu iGabatha. ¹⁴ Kwakungolokulungisela iPhasika kungathi ihora lesithupha . Wathi kubaJuda: Bhekani inkosi yenu. ¹⁵ Ngakho bamemeza bathi : Susa, susa, mbethele esiphambanweni ! Wathi kubo uPilatu : Ngibethele inkosi yenu na ? Abapristi abakhulu baphendula bathi: Asinankosi, uKesari kuphela. ¹⁶ Wayesemnikela kubo ukuba abethelwe esiphambanweni. Ukubethelwa nokufa nokumbelwa kukaJesu (Math. 27: 33; Mark. 15: 22; Luk. 23: 26) Bamthatha-ke uJesu, bahamba naye. ¹⁷ Waphuma ezithwalele isiphambano , waya endaweni ethiwa iNdawo Yekhanda, ethiwa ngesiHeberu iGolgotha. ¹⁸ Bambethela khona nabanye ababili kanye naye ngalapha nangalapha, uJesu ephakathi. ¹⁹ Kepha uPilatu waloba isaziso , wasibeka esiphambanweni . Kwakulotshiwe ukuthi: UJESU WASENAZARETHA, INKOSI YABAJUDA. ²⁰ Khona abaningi babaJuda bafunda leso saziso; ngokuba indawo leyo, lapho uJesu wabethelwa khona esiphambanweni , yayiseduze nomuzi. Kwakulotshiwe ngesiHeberu, nangesiRoma, nangesiGreki. ²¹ Base bethi abapristi abakhulu babaJuda kuPilatu : Ungalobi ukuthi: Inkosi yabaJuda, kepha ukuba yena wathi: NgiyiNkosi yabaJuda. ²² UPilatu waphendula wathi: Engikulobile ngikulobile. ²³ Kuthe amabutho esembethele uJesu esiphambanweni , athatha izingubo zakhe, azenza izabelo ezine , kwaba yilelo nalelo butho laba nesabelo , neyembe futhi . Kepha iyembe lalingenamthungo, lalukiwe lonke kusukela phezulu. ²⁴ Ngakho-ke akhuluma odwa, athi: Asingalidabuli, kodwa asilenzele inkatho yokuthi liyakuba ngelikabani , ukuze kugcwaliseke umbhalo othi : Babelana izingubo zami , benzelana inkatho ngesambatho sami . Lokho-ke akwenza amabutho. ²⁵ Kepha kwakumi ngasesiphambanweni sikaJesu unina kanye nodadewabo kanina, uMariya umkaKleyophase, noMariya Magdalena. ²⁶ Kuthe uJesu ebona unina nomfundi amthandayo bemi ngakhona , wathi kunina: Mame, bheka indodana yakho. ²⁷ Wayesethi kumfundi : Bheka unyoko . Kusukela kuleso sikhathi umfundi lowo wamyisa kwakhe. ²⁸ Emva kwalokho uJe su, ekwazi ukuthi konke sekuphelelisiwe ukuba umbhalo ugcwaliseke, wathi: Ngomile. ²⁹ Kwakubekiwe khona isitsha sigcwele uviniga ; khona bachoma ilula ligcwele uviniga othini lwehisopi, baliyisa emlonyeni wakhe. ³⁰ Kwathi ukuba uJesu ewamukele uviniga , wathi: Kufeziwe; wagebisa ikhanda, wafa. ³¹ Khona abaJuda , ngokuba kwakungolokulungisela , ukuze izidumbu zingahlali esiphambanweni ngesabatha , ngokuba lolo suku lwesabatha lwalulukhulu, banxusa uPilatu ukuba yaphulwe imilenze yabo, basuswe. ³² Ayeseza-ke amabuth o, ayaphula imilenze yowokuqala neyomunye owayebethelwe naye. ³³ Esefika kuJesu, ebona ukuthi usefile, kawayaphulanga imilenze yakhe; ³⁴ kodwa elinye lamabutho lamgwaza ohlangothini ngomkhonto , kwaphuma masinyane igazi namanzi. ³⁵ Obonileyo ufakazile , ubufakazi bakhe buqinisile ; yena-ke uyazi ukuthi ukhuluma iqiniso, ukuze nikholwe nani. ³⁶ Ngokuba lokho kwenzeka ukuba kugcwaliseke umbhalo othi : Akuyikwaphulwa thambo lakhe. ³⁷ Futhi omunye umbhalo uthi: Bayakumbheka abamgwazileyo. ³⁸ Emva kwalokho uJosefa wase -Arimatheya, engumfundi kaJesu kepha ekufihla ngokwesaba abaJuda , wacela kuPilatu ukuba asuse isidumbu sikaJesu; uPilatu wavuma-ke. Wayesefika, wasisusa isidumbu sikaJesu. ³⁹ Kweza noNikodemu owafika kuye kuqala ebusuku , waletha ixube lenhlaka nomhlaba kungathi amalitra ayikhulu. ⁴⁰ Ngakho base besithatha isidumbu sikaJesu , basisonga ngezindwangu zelineni kanye namakha njengesiko labaJuda lokumbela. ⁴¹ Khona ngakuleyo ndawo , lapho wayebethelwe khona esiphambanweni , kwakukhona insimu , nasensimini kukhona ithuna elisha okwakungazange kubekwe muntu kulo. ⁴² Bambeka lapho -ke uJesu ngenxa yolokulungisela lwabaJuda , ngokuba ithuna laliseduze.