¹ Kwathi uSawule esebuyile ekuxosheni amaFilisti , kwabikwa kuye ukuthi : Bheka, uDavide usehlane lase-Eni Gedi. ² USawule wayesethatha abantu abayizinkulungwane ezintathu abakhethiweyo kuye wonke u-Israyeli, wahamba ukumfuna uDavide nabantu bakhe emaDwaleni amaGogo. ³ Wafika ezibayeni zezimvu ngasendleleni, lapho kukhona umhume; uSawule wangena khona ukuba embese izinyawo zakhe . UDavide nabantu bakhe babehlezi emuva emhumeni. ⁴ Abantu bakaDavide bathi kuye : Bheka, nantu usuku uJehova asho ngalo kuwe ukuthi: Bheka, ngiyakunikela isitha sakho esandleni sakho, wenze kuso okuhle emehlweni akho . Wayesesuka uDavide , wasika ngasese umphetho wengubo kaSawule. ⁵ Kwathi ngasemuva uDavide wahlabeka enhliziyweni , ngokuba wayesikile umphetho wengubo kaSawule. ⁶ Wathi kubantu bakhe: Makube kude nami , Jehova, ukuba ngenze okunjalo kuyo inkosi yami, ogcotshiweyo kaJehova, ngelulele isandla sami kuye, lokhu engogcotshiweyo kaJehova. ⁷ UDavide wabathiya ngalawo mazwi , akabavumelanga ukuba bamvukele uSawule. USawule wasuka emhumeni, wahamba. ⁸ Naye uDavide wasuka ng asemuva, waphuma emhumeni, wamemeza emva kukaSawule, ethi: Nkosi yami , nkosi! USawule wabheka emuva , uDavide wakhothamela phansi ngobuso, wakhuleka. ⁹ UDavide wathi kuSawule: Ulalelelani amazwi abantu abathi: Bheka, uDavide ufuna ukukulimaza ? ¹⁰ Bheka, namuhla amehlo akho abonile ukuthi uJehova wayekunikele esandleni sami emhumeni ; abanye bathi mangikubulale , kepha ngakuhawukela, ngathi: Angiyikwelulela isandla sami kuyo inkosi yami , ngokuba ingogcotshiweyo kaJehova. ¹¹ Futhi, baba, bheka, yebo, bheka, umphetho wengubo yakho usesandleni sami, ngokuba lokhu ngasika umphetho wengubo yakho ngingakubulalanga , yazi, ubone ukuthi akukho bubi nasiphambeko esandleni sami , angonanga kuwe, noma uqamekela ukuphila kwami ukuba ukuthathe. ¹² UJehova makahlulele phakathi kwami nawe, uJehova angiphindisele kuwe, kepha isandla sami asiyikuba phezu kwakho. ¹³ Kunjengesaga sasendulo esithi : Kwababi kuvela okubi ; ngalokho isandla sami asiyikuba phezu kwakho. ¹⁴ Inkosi yakwa -Israyeli iphumele ukulandela bani na ? Uxosha bani na ? Uxosha inja efileyo, intwakumba eyodwa nje. ¹⁵ UJehova makabe ngumahluleli , ahlulele phakathi kwami nawe , abheke, angimele, angikhulule esandleni sakho. ¹⁶ Kwathi uDavide eseqedile ukukhuluma lawo mazwi kuSawule , uSawule wathi: Yizwi lakho leli , ndodana yami Davide, na? USawule wadazuluka , wakhala. ¹⁷ Wayesethi kuDavide : Ulungile kunami , ngokuba wena ungiphindisele ngokuhle, kepha mina ngikuphindisele ngokubi. ¹⁸ Ulandile namuhla ukuthi ungenzele okuhle , njengokuba, lapho uJehova ebenginikele esandleni sakho, awungibulalanga. ¹⁹ Ngokuba uma umuntu efica isitha sakhe , uyasivumela ukuba sihambe ngendlela enhle na ? UJehova makakuphindisele ngokuhle ngokwenzileyo kimi namuhla. ²⁰ Manje bheka , ngiyazi ukuthi uyakuba yinkosi impela , nombuso wakwa - Israyeli uyakuqiniswa esandleni sakho. ²¹ Ngalokho ngifungele uJehova ukuthi awuyikunquma inzalo yami emva kwami nokuthi awuyikwesula igama lami endlini kababa. ²² UDavide wafunga kuSawule ; uSawule wagoduka, kepha uDavide nabantu bakhe bakhuphukela enqabeni.