¹ Uyazi yini isikhathi sokuzala kwamagogo , uqaphela ukuzala kwezindluzelekazi, na? ² Ungazibala izinyanga eziziqedayo, uyasazi isikhathi ezizala ngaso, na? ³ Ziyakhonkobala, zizala amazinyane azo, zikhiphe okwemihlelo yazo. ⁴ Amazinyane azo aqina , akhulela endle; ayahamba, angabe esabuyela kuzo futhi. ⁵ Ngubani ovumele imbongolo yasendle ukuba ihambe ; ngubani owathukulula izintambo zayo, ⁶ engenza ihlane libe yindlu yayo , nezwe likasawoti libe yindawo yayo yokuhlala, na? ⁷ Ihleka umsindo wedolobha, ingezwa ukumemeza komshayeli. ⁸ Okufunyanwa ezintabeni kuyidlelo layo: ifuna zonke izinto eziluhlaza. ⁹ Inyathi iyakuthanda ukukhonza, ihlale ebusuku emkhombeni wakho, na? ¹⁰ Ungayibophela inyathi ngentambo emseleni , ibhuqe izigodi emva kwakho , na? ¹¹ Ungayethemba, ngokuba amandla ayo makhulu , ushiye umshikashika wakho kuyo, na? ¹² Ungakholwa yiyo ukuba ibuyise imbewu yakho , iyibuthele esibuyeni sakho, na? ¹³ Amaphiko entshe ayaphaphaza , kepha angamakhombe nezimpaphe zothando na? ¹⁴ Ngokuba iyashiya amaqanda ayo emhlabathini, iwafudumeze othulini. ¹⁵ Iyakhohlwa ukuthi unyawo lungawachoboz a nokuthi isilwane sasendle singawanyathela. ¹⁶ Iphatha kalukhuni amazinyane ayo, kungathi awasiwo awayo; ayinangebhe yokuthi umshikashika wayo ungaba yize. ¹⁷ Ngokuba uNkulunkulu wayenza ukuba ikhohlwe ukuhlakanipha , akayabelanga ukuqonda. ¹⁸ Lapho indizela phezulu, ihleka amahhashi nabagibeli bawo. ¹⁹ Nguwe onika ihhashi amandla alo, wembathisile intamo yalo umhlwenga oyephuzelayo, na? ²⁰ Ulenze ukuba lixhume njengenkumbi na ? Indumo yokuthimula kwalo iyesabeka. ²¹ Liyaphanda ezigodini , liyesasa ngamandla alo , liyaphuma ukuhlangana nezimpi. ²² Liyahleka ingebhe, alesabi, alibuyi phambi kwenkemba. ²³ Isambo siyalikhehlezela nomkhonto okhazimulayo, nengcula. ²⁴ Ngolaka lwalo nangokufutheka kwalo liyagwinya umhlabathi ; alimi ngokukhala kwecilongo. ²⁵ Ekuzwakaleni kwecilongo lithi : Nakho-ke; lihogela ukulwa kusekude , nendumo yezinduna nokumemeza kwazo. ²⁶ Uklebe uyandiza ngokuqonda kwakho , awelulele ngaseningizimu amaphiko akhe, na? ²⁷ Ukhozi lwenyukela phezulu ngezwi lakho , lwakhe isidleke salo phezulu , na? ²⁸ Luhlala esiweni, lwakha khona, eweni ledwala eliyinqaba yalo. ²⁹ Lulapho luhlola ukudla kwalo; amehlo alo akubona kusekude. ³⁰ Amazinyane alo amunca igazi ; lapho kukhona abagwaziweyo , lukhona nalo.