¹ Izwi likaJehova lafika kimi ngomnyaka wesishiyagalolunye , ngenyanga yeshumi ngolweshumi lwenyanga, lathi: ² Ndodana yomuntu, zilobele igama losuku, lona lolo suku; inkosi yaseBabele ihlasele iJerusalema ngalolu suku. ³ Fanekisa ngomfanekiso kuyo indlu ehlubukayo, uthi kubo: Isho kanje iNkosi uJehova, ithi: Beka ikhanzi, libeke, uthele amanzi kulo, ⁴ uqoqele kulo izinqamu zalo , zonke izinqamu ezinhle , ithanga n ehlombe, uligcwalise ngamathambo akhethekileyo. ⁵ Thatha okukhethekileyo komhlambi , ubungele izinkuni phansi kwalo , ulibilise nokulibilisa, kuphekwe namathambo phakathi kwalo. ⁶ Ngalokho isho kanje iNkosi uJehova , ithi: Maye kumuzi wezingazi , kulo ikhanzi elinokugqwala, nokugqwala kwalo kungaphumanga kulo ! Khipha kulo izinqamu ngezinqamu; alidliwanga yinkatho. ⁷ Ngokuba izingazi zawo ziphakathi kwawo ; wazibeka edwaleni eliyinyabule; akazithelanga emhlabathini ukuzisibekela ngothuli. ⁸ Ukuze kuvuswe ukufutheka kube yimpindiselo , ngabeka izingazi zawo edwaleni eliyinyabule ukuba zingasitshekelwa. ⁹ Ngalokho isho kanje iNkosi uJehova , ithi: Maye kumuzi wezingazi ! Nami ngiyakwandisa ukubungela izinkuni. ¹⁰ Fumbela izinkuni , ukhwezele umlilo , uqede inyama, wome umhluzi, amathambo ashiswe. ¹¹ Besewulibeka emalahleni awo lingenalutho, ukuze lishise, kushe ithusi lalo, kuncibilikiswe ukungcola kwalo phakathi kwal o ukuba kuqedwe ukugqwala kwalo. ¹² Ngizikhathazile ngeze , nokho ukugqwala kwalo okuningi akuphumanga kulo; ukugqwala kwalo kumelwe kube semlilweni. ¹³ Ngokungcola kobufebe bakho nangokuba ngikuhlambululile ungahlanjululwanga kodwa awusayikuhlanjululwa ekungcoleni kwakho , ngize nganelise ukufutheka kwami kuwe. ¹⁴ Mina Jehova ngikukhulumile; kuyakwenzeka, ngiyakukwenza; angiyikuyekela, angiyikuhawukela, angiyikuzisola; bayakukwahlulela njengezindlela zakho nezenzo zakho, isho iNkosi uJehova. ¹⁵ Izwi likaJehova lafika kimi, lathi: ¹⁶ Ndodana yomuntu , bheka, ngiyasusa okunxanelekayo emehlweni akho ngesishayo, kepha awuyikudabuka , awuyikukhala, nezinyembezi aziyikwehla. ¹⁷ Bubula, uthule; ungenzi isililo sabafileyo, uzibophele isigqoko sakho, ufake izicathulo zakho ezinyaweni zakho , ungambozi amadevu akho , ungadli isinkwa sabantu. ¹⁸ Ngase ngikhuluma kubantu ekuseni; kusihlwa wafa umkami; kusasa ngenza njengalokho ngiyaliwe. ¹⁹ Abantu bathi kimi : Ungesitshele yini ukuthi lezi zinto ziyini kithina , njengokuba wenze njalo, na? ²⁰ Ngathi kubo: Izwi likaJehova lafika kimi, lathi: ²¹ Yisho kuyo indlu yakwa -Israyeli, uthi: Isho kanje iNkosi uJehova , ithi: Bheka, ngiyakuyingcolisa indlu yami engcwele, ukuziqhenya kwamandla enu, okunxanelekayo emehlweni enu , okuhawukelwa ngumphefumulo wenu ; amadodakazi enu eniwashiyile ayakuwa ngenkemba. ²² Niyakwenza njengami : aniyikumboza amade vu enu , ningadli isinkwa sabantu. ²³ Izigqoko zenu ziyakuba semakhanda enu nezicathulo ezinyaweni zenu ; aniyikudabuka, ningakhali, kepha niyakonda ebubini benu , nibubulelane omunye nomunye. ²⁴ UHezekeli uyakuba yisibonakaliso kini ; niyakwenza njengakho konk e ukwenza kwakhe ; lapho kufikile lokhu , niyakwazi ukuthi ngiyiNkosi uJehova. ²⁵ Wena ndodana yomuntu, angithi kuyakwenzeka mhla ngisusa inqaba yabo, intokozo nobuhle babo , okunxanelekayo emehlweni abo , nababeke umphefumulo wabo kukho, amadodana abo namadodakazi abo, ²⁶ ngalolo suku obalekayo uyakufika kuwe , akuzwise lokhu ngezindlebe zakho, na? ²⁷ Ngalolo suku umlomo wakho uyakuvulwa kobalekileyo; wena uyakukhuluma, ungabe usaba yisimungulu ; uyakuba yisibonakaliso kubo , bazi ukuthi nginguJehova.