¹ Kwathi esehlile entabeni, zamlandela izixuku eziningi. ² Bheka, kwafika onochoko , wakhuleka kuye , wathi: Nkosi, uma uthanda , ungangihlambulula. ³ Wayeselula isandla , wamphatha, wathi: Ngiyathanda; hlambuluka. Wayesehlambuluka masinyane ochokweni lwakhe. ⁴ UJesu wayesethi kuye : Bheka, ungatsheli muntu , kepha hamba uzibonakalise kumpristi , uyise umnikelo owayalelwa nguMose , kube ngubufakazi kubo. Ukuphulukiswa kwenceku yenduna (Luk. 7:1) ⁵ Kwathi esangena eKapernawume , kweza kuye induna yekhulu , yamncenga yathi: ⁶ Nkosi, umfana wami ulele endlini , ufe uhlangothi , ukhwelwe kakhulu ngubuhlungu. ⁷ Wathi kuyo: Mina ngizakuza ngimphulukise. ⁸ Induna yekhulu yaphendula yathi : Nkosi, angifanele ukuba ungene phansi kophahla lwami, kepha yisho izwi nje, khona umfana wami uyakusinda. ⁹ Ngokuba nami ngingumuntu ophansi kwamakhosi , nginamabutho phansi kwami; ngithi kwelinye: Hamba, lihambe; ngithi kwelinye : Woza, lize; nasencekwini yami: Yenza lokhu, ikwenze. ¹⁰ UJesu ekuzwa lokho wamangala , wathi kwabamlandelayo : Ngiqinisile ngithi kini : Angizange ngifumane kwa -Israyeli ukukholwa okungaka kumuntu. ¹¹ Kepha ngithi kini : Abaningi bayakuza bevela empumalanga nasentshonalanga, bahlale ekudleni no -Abrahama no -Isaka noJakobe embusweni wezulu, ¹² kodwa abantwana bombuso bayakukh ishelwa ebumnyameni obungaphandle; lapho kuyakuba khona ukukhala nokugedla amazinyo. ¹³ UJesu wayesethi enduneni yekhulu: Hamba, makube kuwe njengokukholwa kwakho. Umfana wasinda ngaso leso sikhathi. Umkhwekazi kaPetru nabanye abagulayo bayaphulukiswa (Mark. 1:23; Luk. 4:31) ¹⁴ UJesu wayesengena endlini kaPetru , wabona umkhwekazi wakhe elele phansi enomkhuhlane. ¹⁵ Waphatha isandla sakhe, umkhuhlane wamyeka; wavuka, wamkhonza. ¹⁶ Kwathi sekuhlwile , baletha kuye abaningi abakhwelwe ngamademoni , wakhipha omoya ngezwi, waphulukisa bonke abagulayo, ¹⁷ ukuze kugcwaliseke okwakhulunywa ngo -Isaya umprofethi ukuthi : Yena wabetshatha ubuthakathaka bethu, wathwala izifo zethu. Ukumlandela uJesu (Luk. 9:57) ¹⁸ Kwathi uJesu ebona isixuku simhaqile , wayala ukuba kuwelelwe ngaphesheya. ¹⁹ Kwase kufika umbhali, wathi kuye: Mfundisi, ngizakukulandela, noma uya ngaphi. ²⁰ UJesu wayesethi kuye : Izimpungushe zinemigodi , nezinyoni zezulu zinezidleke, kepha iNdodana yomuntu kayinandawo , lapho ingacamelisa khona ikhanda. ²¹ Kodwa omunye w abafundi bakhe wathi kuye : Nkosi, ngivumele ngiye kuqala ukuyakummbela ubaba. ²² Kepha uJesu wathi kuye : Ngilandele; yeka abafileyo bembele abafileyo babo. Ukuthuliswa kwesivunguvungu (Mark. 4:35; Luk. 8:22) ²³ Wayesengena emkhunjini; abafundi bakhe bamlandela. ²⁴ Bheka, kwavuka isiphepho esikhulu elwandle , umkhumbi waze wagujuzelwa ngamaza; kepha yena wayelele. ²⁵ Basondela, bamvusa, bathi: Nkosi, sisindise, safa. ²⁶ Wayesethi kubo: Nesabelani nina bokukholwa okuncane na? Khona wavuka wakhuza umoya nolwandle, kwaba khona ukuthula okukhulu. ²⁷ Kepha abantu bamangala , bathi: Unjani lo ukuba nomoya nolwandle kumlalele na? Ukukhishwa kwamademoni (Mark. 5:1; Luk. 8:26) ²⁸ Kwathi esefikile ngaphesheya ezweni lamaGadara , kwahlangana naye ababili abakhwelwe ngamademoni , bephuma emathuneni , beyizidlova ezinkulu ngangokuba kwakungedlule muntu ngaleyo ndlela. ²⁹ Bheka, bamemeza bathi: Sinamsebenzi muni nawe Ndodana kaNkulunkulu? Uze lapha ukusizwisa ubuhlungu, kungakabi yiso isikhathi, na? ³⁰ Manje kwakukhona kude nabo umhlambi wezingulube eziningi ziklabile. ³¹ Amademoni amncenga athi : Uma usikhipha , sithume ukuba singene emhlambini wezingulube. ³² Wathi kuwo : Hambani. Ayesephuma, angena ezingulubeni ; bheka, umhlambi wonke wagulukudela eweni , waphonseka elwandle , wafela emanzini. ³³ Kodwa ababezalusa babaleka , baya emzini , babika konke , nalokho okwehlele abakhwelwe ngamademoni. ³⁴ Bheka, umuzi wonke waphuma ukuyomhlangabeza uJesu ; bathe bembona, bamncenga ukuba amuke emikhawulweni yelakubo.