¹ O nina maGalathiya angaqondiyo ! Ngubani oniloyileyo nina enalotshelwa phambi kwamehlo enu umfanekiso kaJesu Kristu ebethelwe esiphambanweni na? ² Yilokhu kuphela engithanda ukukwazi kinina ukuthi : Namukeliswa uMoya ngemisebenzi yomthetho noma ngezwi lokukholwa na? ³ Niwulekile kangaka na? Niqalile kuMoya seniyakugcina enyameni na? ⁴ Nahlupheka kangaka ngeze na? uma kambe kungeze. ⁵ Ngakho yena oninikayo uMoya noveza imisebenzi yamandla phakathi kwenu ukwenza ngemisebenzi yomthetho noma ngezwi lokukholwa na? Umuntu uyalungisiswa ngokukholwa ⁶ Njengalokho u -Abrahama wakholwa nguNkulunkulu , kwabalelwa kuye ukuthi ngukulunga. ⁷ Yazini-ke ukuthi abokukholwa yibona abangamadodana ka-Abrahama. ⁸ Kepha umbhalo , ubona ngaphambili ukuthi uNkulunkulu uzakulungisisa abezizwe ngokukholwa, walishumayela ngaphambili ivangeli ku-Abrahama, wathi: Izizwe zonke ziyakubusiswa kuwe. ⁹ Njalo-ke abokukholwa bayabusiswa kanye no-Abrahama okholwayo. ¹⁰ Ngokuba bonke abemisebenzi yomthetho baphansi kwesiqalekiso, ngokuba kulotshiwe ukuthi : Baqalekisiwe bonke abangemi njalo kukho konke okulotshiweyo encwadini yomthetho ukuba bakwenze. ¹¹ Kepha ukuthi ngomthetho akukho muntu olungisiswayo phambi kukaNkulunkulu kusobala, ngokuba olungileyo uzakuphila ngokukholwa; ¹² ngokuba umthetho awusiwo owokukholwa , kodwa owenza lokho uyakuphila ngakho. ¹³ UKristu wasihlenga esiqalekisweni somthetho, ebenziwe isiqalekiso ngenxa yethu, ngokuba kulotshiwe ukuthi: Baqalekisiwe bonke abalenga emthini, ¹⁴ ukuba isibusiso sika-Abrahama ngoKristu Jesu sifike kubo abezizwe, ukuze samukeliswe isithembiso sikaMoya ngokukholwa. Isithembiso asichithwa ngumthetho ¹⁵ Bazalwane, ngikhulumisa okwabantu : nokuba kuyintando yokugcina yomuntu eyaqiniswayo, akakho oyichithayo noma enezele kuyo. ¹⁶ Manje-ke izithembiso zanikwa u -Abrahama nenzalo yakhe; akasho ukuthi: Ezinzalweni, kungathi ngeziningi , kepha kungathi ngeyodwa ukuthi : Nasenzalweni yakho enguKristu. ¹⁷ Kepha ngisho lokhu ukuthi isivumelwano esaqiniswa nguNkulunkulu ngaphambili, umthetho owavela emva kweminyaka engamakhulu amane namashumi amathathu, awusesuli, uze usichithe isithembiso; ¹⁸ ngokuba uma ifa likhona ngomthetho, alikho ngesithembiso ; kepha uNkulunkulu umnikile lona u-Abrahama ngesithembiso. ¹⁹ Pho, umthetho uyini na ? Wenezelwa ngenxa yeziphambeko , kuze kufike inzalo enikiwe isithembiso, umisiwe ngezingelosi, ngesandla somlamuleli. ²⁰ Kepha umlamuleli kasiye owamunye; kepha uNkulunkulu munye. ²¹ Pho-ke, umthetho uphambene nezithembiso zikaNkulunkulu na ? Qha nakanye. Ngokuba uma wawunikiwe umthetho onamandla okuphilisa , ngempela ukulungisiswa ngakuya ngomthetho. ²² Kepha umbhalo uvalele konke phansi kwesono , ukuze isithembiso ngokukholwa nguJesu Kristu siphiwe abakholwayo. Umthetho ongumlayi uyisa kuKristu ²³ Kepha kungakafiki ukukholwa , sasigcinwa phansi komthetho , sivalelwe kuze kufike ukukholwa obekuzakwambulwa. ²⁴ Njalo-ke umthetho sewaba ngumlayi wethu wokusiyisa kuKristu , ukuze silungisiswe ngokukholwa. ²⁵ Kepha-ke sekufikile ukukholwa, asisephansi komlayi. ²⁶ Ngokuba nonke ningabantwana bakaNkulunkulu ngokukholwa kuKristu. ²⁷ Ngokuba nonke enabhapathizelwa kuKristu nembatha uKristu. ²⁸ Akakho umJuda nomGreki , akakho oboshiweyo nokhululekileyo , akakho owesilisa nowesifazane, ngokuba nina nonke nimunye kuKristu Jesu. ²⁹ Kepha uma ningabakaKristu , seniyinzalo ka -Abrahama, niyizindlalifa ngokwesithembiso.