¹ Ungayikhaci indoda endala , kodwa yiyale njengoyihlo , namadoda amasha njengabafowenu, ² abesifazane abadala njengawonyoko , nabesifazane abasha njengawodadewenu ngenhlanzeko epheleleyo. Ngabafelokazi ³ Yazisa abafelokazi abangabafelokazi ngoqobo. ⁴ Kepha uma umfelokazi enabantwana noma enabazukulwane , labo-ke mabafunde kuqala ukuhlonipha indlu yakwabo , babuyisele okufaneleyo kubazali babo, ngokuba kuyabongeka lokho phambi kukaNkulunkulu. ⁵ Lowo ongumfelokazi ngoqobo osele eyedwa uthembele kuNkulunkulu , uhlala ekunxuseni nasekukhulekeni ubusuku nemini, ⁶ kepha lowo ozinikela ekutamaseni ufile esekhona. ⁷ Yala ngalezo zinto, ukuze bangabi nokusoleka. ⁸ Kepha-ke uma umuntu engabondli abakubo, kakhulu abakwakhe, ukulahlile ukukholwa, mubi kunongakholwayo. ⁹ Makangafakwa esibalweni umfelokazi , uma engaphansi kweminyaka engamashumi ayisithupha, owabe ngumfazi wendoda inye, ¹⁰ ebongwa ngemisebenzi emihle , uma ondlile abantwana , uma engenisile izihambi, uma egezile izinyawo zabangcwele , uma esizile abahluphekayo , uma ekhuthalele umsebenzi wonke omuhle. ¹¹ Kepha abafelokazi abasha ubenqabe ; ngokuba uma sebetamasile bedela uKristu, bafuna ukugana; ¹² banokulahlwa, ngokuba bechithile ukukholwa kwabo kokuqala. ¹³ Futhi-ke bafunda nokuvilapha , bezula izindlu ngezindlu , bengavilaphi kuphela, kepha behleba, bezigaxa ngokungekwabo, bekhuluma okungafanele. ¹⁴ Ngakho-ke ngithanda ukuba abafelokazi abasha bagane, bazale abantwana, baphathe indlu yabo, bangasiniki isitha ithuba lokuthuka. ¹⁵ Ngokuba nakalokhu abanye sebechezukele kuSathane. ¹⁶ Uma owesifazane okholwayo enabafelokazi , makabasize, ibandla lingasindwa, ukuze lisize abafelokazi boqobo. Amalunga afanele ukondliwa yibandla ¹⁷ Amalunga aphatha kahle akuthiwe afanele ukutuswa ngokuphindiweyo , ikakhulu lawo akhuthalela izwi nokufundisa. ¹⁸ Ngokuba umbhalo uthi : Ungayifaki isifonyo inkabi ebhulayo , futhi: Isisebenzi siyifanele inkokhelo yaso. Ngokuthetha amacala nezinye iziluleko ¹⁹ Icala eliqondene nelunga ungalemukeli , kungekho ofakazi ababili noma abathathu. ²⁰ Abonayo ubasole phambi kwabo bonke, ukuze nabanye besabe. ²¹ Ngiyaqinisa phambi kukaNkulunkulu noKristu Jesu nezingelosi ezikhethiweyo ukuba ulonde lezo zinto ngokungazinqumeli , ungenzi lutho ngokukhetha. ²² Ungasheshi ubeke izandla noma kubani , futhi ungahlanganyeli izono zabanye, uzigcine ube mhlophe. ²³ Ungabe usaphuza amanzi odwa, kepha phuza iwayini eliyingcosana ngenxa yesisu sakho nobuthakathaka bakho obuvamileyo. ²⁴ Izono zabanye abantu zisobala, zibandulela ekwahlulelweni; kepha abanye ziyabalandela. ²⁵ Ngokunjalo nemisebenzi emihle isobala; naleyo engenjalo ingesitheke.