¹ Abantwana bakwa -Israyeli bahamba , bamisa emathafeni akwaMowabi ngaphesheya kweJordani ngaseJeriko. ² UBalaki indodana kaSipori wabona konke akwenzile u -Israyeli kuwo ama - Amori. ³ UMowabi wayesesaba kakhulu abantu , ngokuba babebaningi ; uMowabi waba nosizi ngenxa yabantwana bakwa-Israyeli. ⁴ UMowabi wathi kumalunga akwaMidiyani: Manje leli bandla liyakukhotha konke okungakithi nxazonke , njengalokhu inkabi ikhotha utshani bedlelo . UBalaki indodana kaSipori wayeyinkosi yakwaMowabi ngaleso sikhathi. ⁵ Wathuma izithunywa kuBileyamu indodana kaBeyori ePethori elingasemfuleni ezweni labantwana babantu ba khe ukumbiza ngokuthi : Bheka, nampa abantu abaphumile eGibithe ; bheka, basibekela ubuso bomhlaba; sebehlala malungana nami; ⁶ ngalokho ake uze manje , ungiqalekisele laba bantu, ngokuba bayangahlula; mhlawumbe ngingaze ngibe namandla ukuba sibanqobe , ngibaxoshe ezweni, ngokuba ngiyazi ukuthi ombusisayo ubusisiwe, nomqalekisayo uqalekisiwe. ⁷ Amalunga akwaMowabi namalunga akwaMidiyani asuka enenkokhelo yokubhula esandleni sawo ; ayesefika kuBileyamu , akhuluma kuye amazwi kaBalaki. ⁸ Wathi-ke kuwo: Hlalani lapha lobu busuku, nginibuyisele izwi, njengalokhu uJehova eyakukhuluma kimi. Izikhulu zakwaMowabi zahlala-ke kuBileyamu. ⁹ UNkulunkulu wafika kuBileyamu, wathi: Ngobani lawa madoda akuwe na? ¹⁰ UBileyamu wathi kuNkulunkulu: UBalaki indodana kaSipori , inkosi yakwaMowabi, uthumile kimi wathi: ¹¹ Bheka, abantu abaphumile eGibithe basibekela ubuso bomhlaba ; woza kalokhu, ungiqalekisele bona; mhlawumbe ngingaze ngibe namandla ukulwa nabo, ngibaxoshe. ¹² UNkulunkulu wathi kuBileyamu : Awuyikuhamba nawo ; awuyikuqalekisa abantu, ngokuba babusisiwe. ¹³ UBileyamu wavuka ekuseni , wathi kuzo izikhulu zikaBalaki : Buyelani ezweni lakini, ngokuba uJehova uyangalela ukuba ngihambe nani. ¹⁴ Izikhulu zakwaMowabi zasuka , zaya kuBalaki , zathi: UBileyamu uyala ukufika nathi. ¹⁵ UBalaki wabuye wathuma izikhulu, ziningi, zidumile kunezokuqala. ¹⁶ Zafika kuBileyamu, zathi kuye: Usho kanje uBalaki indodana kaSipori, uthi: Ake ungavinjwa lutho ukuza kimi, ¹⁷ ngokuba ngiyakukunika udumo olukhulu , nakho konke ongitshela khona ngiyakukwenza; ake uze ngalokho manje, ungiqalekisele laba bantu. ¹⁸ UBileyamu waphendula wathi kuzo izinceku zikaBalaki : Noma uBalaki ebeyakunginika indlu yakhe igcwele isiliva negolide, anginakulidlula izwi likaJehova uNkulunkulu wami ukwenza okuncane nokukhulu. ¹⁹ Ngalokho ake nihlale nani lapha lobu busuku , ukuze ngazi ukuthi uJehova useyakukhulumani kimi futhi. ²⁰ UNkulunkulu weza kuBileyamu ebusuku , wathi kuye: Uma amadoda efika ukukubiza, vuka uhambe nawo; kepha lelo zwi kuphela engilikhuluma kuwe uyakulenza. ²¹ UBileyamu wa vuka ekuseni , wabophela imbongolo yakhe , wahamba nezikhulu zakwaMowabi. ²² Intukuthelo kaNkulunkulu yavutha ngokuba wahamba ; ingelosi kaNkulunkulu yema endleleni ukuba imelane naye . Wayekhwele imbongolo yakhe, izinceku zakhe ezimbili zinaye. ²³ Imbongolo yab ona ingelosi kaJehova imi endleleni , inenkemba yayo ehoshiweyo esandleni sayo ; imbongolo yachezuka endleleni , yaya ensimini, kepha uBileyamu wayishaya imbongolo ukuyibuyisela endleleni. ²⁴ Ingelosi kaJehova yayisima endleleni engumngcingo phakathi kwezivini , kwaba ludonga ngalapha nodonga ngalapha. ²⁵ Imbongolo yayibona ingelosi kaJehova , yazigqula odongeni , yalimaza unyawo lukaBileyamu ngasodongeni; wabuye wayishaya. ²⁶ Ingelosi kaJehova yaqhubeka yema endaweni eminyeneyo , lapho kwakungekho khona indlela yoku jika ngakwesokunene noma ngakwesokhohlo. ²⁷ Imbongolo yayibona ingelosi kaJehova , yalala phansi kukaBileyamu ; intukuthelo kaBileyamu yavutha, wayishaya imbongolo ngenduku yakhe. ²⁸ UJehova wavula umlomo wembongolo , yathi kuBileyamu: Ngenzeni kuwe ukuba ungishaye kathathu na? ²⁹ UBileyamu wathi embongolweni : Ngokuba ungiswabulele; sengathi ngabe kukhona inkemba esandleni sami, ngokuba ngabe sengikubulele. ³⁰ Kepha imbongolo yathi kuBileyamu : Angisiyo imbongolo yakho oyikhwele konke ukuhamba kwakho kuze kube manje na? Ngangivama ukwenza kanjalo kuwe na? Wathi: Qha. ³¹ UJehova wayesevula -ke amehlo kaBileyamu, wayibona ingelosi kaJehova imi endleleni, inenkemba yayo ehoshiweyo esandleni sayo ; wagoba ikhanda, wawa ngobuso bakhe. ³² Ingelosi kaJehova yathi kuye : Uyishayeleni imbongolo yakho kathathu na ? Bheka, ngiphumele ukumelana nawe, ngokuba indlela yakho iyingozi phambi kwami; ³³ imbongolo yangibona , yachezuka phambi kwami kathathu ; uma ibingachezukanga kimi, ngabe sengikubulele, ngayisindisa yona. ³⁴ Wathi uBileyamu k uyo ingelosi kaJehova : Ngonile; ngokuba bengingazi ukuthi umi endleleni umelene nami; ngalokho uma kukubi emehlweni akho , ngiyakubuyela emuva. ³⁵ Yayisithi ingelosi kaJehova kuBileyamu: Hamba nalawa madoda, kepha lelo zwi kuphela engiyakulikhuluma kuwe uyak ulikhuluma. UBileyamu wayesehamba nezikhulu zikaBalaki. ³⁶ UBalaki esezwa ukuthi uBileyamu uyeza , waphuma ukumhlangabeza e -Iri Mowabi elisemkhawulweni wase-Arinoni, liseceleni komkhawulo. ³⁷ UBalaki wathi kuBileyamu: Angithumanga nokuthuma kuwe ukukubiza na? Awufikanga ngani kimi? Anginamandla yini okukunika udumo na? ³⁸ UBileyamu wathi kuBalaki : Bheka, sengifikile kuwe, anginamandla nokho manje okukhuluma utho . Izwi uNkulunkulu alifaka emlonyeni wami , ngiyakukhuluma lona. ³⁹ UBileyamu wahamba noBalaki, bafika eKiriyati Husoti. ⁴⁰ UBalaki wanikela ngezinkabi nangezimvu, wazithuma kuBileyamu nakuzo izikhulu ezinaye. ⁴¹ Kwathi ekuseni uBalaki wamthatha uBileyamu , wamyisa ezindaweni eziphakemeyo zikaBali, wabona elapho inxenye yabantu.