¹ UJehova wakhuluma kuMose, wathi: ² Uma umuntu ona , enze isiphambeko kuJehova , akhohlise umakhelwane wakhe ngento ebekiweyo , noma isibambiso noma into ephangiweyo , noma ecindezela umakhelwane wakhe, ³ noma, lapho ethola into elahlekileyo , eyiphika, afunge amanga , noma yikuphi kukho konke lokhu umuntu akwenzayo one ngakho, ⁴ khona kuyakuthi , uma onile aze abe necala , uyakukubuyisa lokho okuphangiweyo, noma lokho akudlileyo , noma lokho okwakubekwe kuye , noma lokho okwakulahlekile akutholayo, ⁵ noma yi kuphi afungile amanga ngakho ; makakubuyise, athasisele okwesihlanu kukho, amnike lowo okungokwakhe ngosuku lomnikelo wakhe wecala. ⁶ Woletha umnikelo wakhe wecala kuJehova , inqama engenasici yasemhlambini ngokulinganisa kwakho , ibe ngumnikelo wecala , iyiswe kumpristi, ⁷ umpristi amenzele ukubuyisana phambi kukaJehova, aze athethelelwe konke angahle abe ekwenzile anecala ngakho. ⁸ UJehova wakhuluma kuMose, wathi: ⁹ Yala u -Aroni namadodana akhe , uthi: Nanku umthetho weminikelo yokushiswa: umnikelo wokushiswa uyakuhlala eziko le-altare ubusuku bonke kuze kuse, umlilo we-altare uhlale kulo uvutha njalo. ¹⁰ Umpristi uyakwembatha isambatho selineni , afake nebhulukwe lakhe lelineni emzimbeni wakhe , asuse umlotha womlilo oshise umnikelo wokushiswa e-altare, awuthele ngaseceleni kwe-altare. ¹¹ Abesekhumula izambatho zakhe , embathe ezinye izambatho , akhiphele umlotha ngaphandle kwekamu endaweni ehlambulukileyo. ¹² Umlilo ophezu kwe-altare uyakuhlala kulo uvutha njalo, ungacimi; umpristi uyakubasa izinkuni kulo ekuseni njalo , ahlele kulo umnikelo wokushiswa , ashise kulo amanoni eminikelo yokuthula. ¹³ Umlilo wohlala e-altare uvutha njalo, ungacimi. ¹⁴ Nanku umthetho weminikelo yempuphu : amadodana ka -Aroni ayakunikela ngawo phambi kukaJehova ngaphambi kwe-altare. ¹⁵ Makucashunwe kuwo ngokhweshe impuphu ecolekileyo yomnikelo wempuphu namafutha awo , nayo yonke inhlaka ephezu komnikelo wempuphu, akushise e -altare kube yisikhumbuzo sawo , kube yiphunga elimnandi kuJehova. ¹⁶ Okuseleyo kuwo kuyakudliwa ngu -Aroni namadodana akhe , kudliwe ngaphandle kwemvubelo endaweni engcwele , bakudlele egcekeni letende lokuhlangana. ¹⁷ Akuyikuphekwa ngemvubelo . Ngikunike kube yisabelo sabo seminikelo yami yomlilo ; kungcwelengcwele njengomnikelo wesono nanjengomnikelo wecala. ¹⁸ Bonke abesilisa phakathi k wabantwana baka -Aroni bayakukudla kube yisimiso esiphakade ezizukulwaneni zenu seminikelo yomlilo kaJehova ; konke okukuthintayo kuyakuba ngcwele. ¹⁹ UJehova wakhuluma kuMose, wathi: ²⁰ Nanku umnikelo ka -Aroni nowamadodana akhe abayakunikela ngawo kuJehova mhla begcotshwa: okweshumi kwe-efa lempuphu ecolekileyo kube ngumnikelo wempuphu njalonjalo , inxenye yakho ekuseni nenxenye yakho kusihlwa. ²¹ Uyakwenziwa emqengeleni ngamafutha ; usuxutshanisiwe wowungenisa , unikele ngomnikelo wempuphu , ube yizingcezu ezihl eshuliweyo, zibe yiphunga elimnandi kuJehova. ²² Umpristi ogcotshiweyo esikhundleni sakhe phakathi kwamadodana akhe wonikela ngawo, kube yisimiso esiphakade; woshiswa wonke. ²³ Yonke iminikelo yempuphu yompristi yoshiswa yonke, ingadliwa. ²⁴ UJehova wakhuluma kuMose, wathi: ²⁵ Yisho ku -Aroni nakumadodana akhe , uthi: Nanku umthetho weminikelo yesono; endaweni ohlatshelwe kuyo umnikelo wokushiswa , mawuhlatshelwe khona umnikelo wesono phambi kukaJehova; ungcwelengcwele. ²⁶ Umpristi onikela ngawo ngesono wowudla , udliwe endaweni engcwele egcekeni letende lokuhlangana. ²⁷ Konke okuyakuthinta inyama yawo kuyakuba ngcwele; nxa ingubo ifafazwa ngegazi lawo, lapho kufafazwe khona uyakukugeza endaweni engcwele. ²⁸ Kepha isitsha sebumba okuphekelwe kuso masaphulwe , kodwa uma kuphekelwa esitsheni sethusi, siyakuphucuzwa, sihashazwe ngamanzi. ²⁹ Bonke abesilisa phakathi kwabapristi bayakuwudla; ungcwelengcwele. ³⁰ Kepha makungadliwa mnikelo wesono okwangeniswa igazi lawo etendeni lokuhlangana ukuba kwenziwe ukubuyisana endaweni engcwele; woshiswa ngomlilo.