¹ Wayesethi kimi: Ndodana yomuntu, yidla okufumanayo, udle lo mqulu, uye ukhulume kuyo indlu yakwa-Israyeli. ² Ngavula umlomo wami, wangidlisa umqulu. ³ Wathi kimi: Ndodana yomuntu, sidlise isisu sakho, ugcwalise izibilini zakho ngalo mqulu engikunika wona . Ngase ngiwudla , wawumnandi emlonyeni wami njengezinyosi. ⁴ Wayesethi kimi : Ndodana yomuntu , hamba uye endlini yakwa -Israyeli, ukhulume kuyo ngamazwi ami. ⁵ Ngokuba awuthunywa kubantu abankulumo yabo ilukhuni nolimi lwabo lungaqondakali, kepha endlini yakwa-Israyeli, ⁶ kungekubantu abaningi abankulumo yabo ilukhuni nolimi lwabo lungaqondakali, ongawezwa amazwi abo . Impela uma bengikuthume kubo , bona babeyakukuzwa. ⁷ Kepha indlu yakwa-Israyeli kayiyikukuzwa, ngokuba ayingizwa mina, lokhu indlu yakwa-Israyeli inebunzi elilukhuni nenhliziyo enqala. ⁸ Bheka, ngenze ubuso bakho bube lukhuni njengobuso babo , nebunzi lakho libe nqala njengamabunzi abo. ⁹ Ngenze ibunzi lakho njengedayimani , elilukhuni kunensengetsha; ungabesabi, ungapheli amandla ngobuso babo, noma beyindlu ehlubukayo. ¹⁰ Futhi wathi kimi : Ndodana yomuntu , onke amazwi ami engiyakuwakhuluma kuwe wamukele enhliziyweni yakho , uzwe ngezindlebe zakho. ¹¹ Hamba uye kubathunjwa , kubantwana babantu bakho , ukhulume kubo , uthi kubo: Isho njalo iNkosi uJehova, noma bezwa noma benganaki. ¹² Wayesengiphakamisa uMoya , ngezwa emva kwami izwi lokuduma okukhulu, lathi: Mayibusiswe inkazimulo kaJehova endaweni yakhe; ¹³ nomsindo wamaphiko ezidalwa athintanayo, nomsindo wamasondo eceleni kwazo, umsindo wokukhulu ukuduma. ¹⁴ UMoya wayesengiphakamisa , wangisusa; ngahamba nginomunyu ngokufutheka komoya wami ; isandla sikaJehova saba namandla phezu kwami. Umprofethi ungumlindi ¹⁵ Ngafika kubathunjwa ngaseTheli Abibi ababehlezi ngasemfuleni iKhebari , lapho babehlala khona ; ngahlala kho na phakathi kwabo izinsuku eziyisikhombisa ngimangele. ¹⁶ Kwathi ekugcineni kwezinsuku eziyisikhombisa izwi likaJehova lafika kimi, lathi: ¹⁷ Ndodana yomuntu , ngikwenze umlindi kuyo indlu yakwa -Israyeli; ngalokho yizwa izwi emlonyeni wami, ungixwayisele bona. ¹⁸ Lapho ngithi komubi: Uyakufa nokufa, bese wungamxwayisi, ungakhulumi ukumxwayisa omubi ngendlela yakhe ukuba umsindise , yena lowo omubi uyakufela ezonweni zakhe, kepha igazi lakhe ngiyakulibiza esandleni sakho. ¹⁹ Kepha wena , uma umxwayisa omubi , angaze abuya ebubini bakhe nasendleleni yakhe embi, uyakufela ezonweni zakhe, kepha wena uwophulile umphefumulo wakho. ²⁰ Lapho olungileyo ephenduka ekulungeni kwakhe , enze okubi , ngibeke isikhubekiso phambi kwakhe , uyakufa. Uma ungamxwayisanga , uyakufela ezonweni zakhe , nezenzo zakhe ezilungileyo azenzileyo aziyikukhunjulwa , kepha igazi lakhe ngiyakulibiza esandleni sakho. ²¹ Kepha uma umxwayisa olungileyo ukuba olungileyo angoni , abese engoni, uyakuphila nokuphila, ngokuba exwayile; wena-ke uwophulile umphefumulo wakho. ²² Isandla sikaJehova saba phezu kwami lapho, wathi kimi: Suka, uphume uye ethafeni, ngiyakukhuluma nawe khona. ²³ Ngasuka, ngaphuma ngaya ethafeni ; bheka, inkazimulo kaJehova yayimi khona njengenkazimulo engayibona ngasemfuleni iKhebari , ngawa ngobuso bami. ²⁴ UMoya wayesengena kimi, wangimisa ngezinyawo zami, wakhuluma kimi, wathi kimi: Hamba uzivalele endlini yakho. ²⁵ Kepha wena ndodana yomuntu , bheka, bayakufaka amagoda kuwe , bakubophe ngawo; awuyikuphumela phakathi kwabo. ²⁶ Ngiyakunamathelisa ulimi lwakho olwangeni lwakho ukuba ube yisimungulu, ungabi ngumuntu obayalayo, ngokuba bayindlu ehlubukayo. ²⁷ Kepha lapho ngikhuluma nawe, ngiyakuwuvula umlomo wakho, wena uthi kubo: Isho njalo iNkosi uJehova . Ozwayo makezwe , onganakiyo kayeke , ngokuba bayindlu ehlubukayo.