¹ Izwi likaJehova lafika kimi, lathi: ² Wena ndodana yomuntu uyakuwahlulela, uyakuwahlulela umuzi wegazi na? Uyakuwazisa-ke zonke izinengiso zawo, ³ uthi: Isho kanje iNkosi uJehova , ithi: Wena muzi ochitha igazi phakathi kwakho, ukuze isikhathi sakho sifike , nowenza izithombe kuwe ukuzingcolisa, ⁴ ngegazi olichithileyo un ecala, nangezithombe zakho ozenzileyo ungcolile ; usondezile izinsuku zakho , ufikile eminyakeni yakho ; ngalokho ngikwenzile ihlazo ezizweni nenhlekiso emazweni onke. ⁵ Abaseduze nabakude nawe bayakukuhleka wena onegama elingcolileyo, ogcwele isiphithiphithi. ⁶ Bheka, izikhulu zakwa -Israyeli, kwaba yileso naleso njengamandla aso , zaziphakathi kwakho ukuchitha igazi. ⁷ Bathukile kuwe uyise nonina, bacindezela abezizwe phakathi kwakho, bona phakathi kwakho izintandane nabafelokazi. ⁸ Okungcwele kwami ukudelele, wawona amasabatha ami. ⁹ Abantu abahlebayo babekuwe ukuchitha igazi , badla kuwe ezintabeni , benza ubufebe phakathi kwakho. ¹⁰ Bahlubulile kuwe ubunqunu bukayise , bamona yena owayahlukene ekungcoleni kwakhe. ¹¹ Omunye wenzile isinengiso nomkamakhelwane wakhe; omunye ungcolisile ngobufebe umalokazana wakhe ; omunye wonile phakathi kwakho udadewabo, indodakazi kayise. ¹² Bamukele imivuzo phakathi kwakho ukuba bachithe igazi ; wena uthathe inzalo nenzuzo , waphanga abakhelwane bakho ngokubacindezela , wangikhohlwa mina, isho iNkosi uJehova. ¹³ Bheka, ngishayile isandla sami ngokuphanga kwakho okwenzileyo nangenxa yegazi lakho elaliphakathi kwakho. ¹⁴ Inhliziyo yakho iyakuma yini , izandla zakho ziqine ezinsukwini engiyakuphathana nawe ngazo , na? Mina Jehova ngikukhulu mile, ngiyakukwenza. ¹⁵ Ngiyakukuhlakazela ezizweni , ngikusabalalisele emazweni , ngiqede ukungcola kwakho kuwe. ¹⁶ Uyakungcoliswa phakathi kwakho emehlweni ezizwe ; uyakwazi ukuthi nginguJehova. ¹⁷ Izwi likaJehova lafika kimi, lathi: ¹⁸ Ndodana yomuntu, indlu yakwa-Israyeli isingamanyela kimi ; bonke babo bayithusi nethini nensimbi nomthofu phakathi kwesithando ; bangamanyela esiliva. ¹⁹ Ngalokho isho kanje iNkosi uJehova, ithi: Ngenxa yokuba seningamanyela nonke, ngalokho bhekani, ngiyakunibuthela phakathi kweJerusalema. ²⁰ Njengokuqoqwa kwesiliva nethusi nensimbi nomthofu nethini phakathi kwesithando ukuba kufuthwe umlilo phezu kwakho ukukuncibilikisa, kanjalo ngiyakunibutha ngentukuthelo yami nangokufutheka kwami , nginibeke khona, nginincibilikise. ²¹ Yebo, ngiyakunibutha, nginifuthe ngomlilo wentukuthelo yami , nincibilikiswe phakathi kwawo. ²² Njengokuncibilikiswa kwesiliva phakathi kwesithando , kanjalo niyakuncibilikiswa phakathi kwaso , nazi ukuthi mina Jehova ngithululile ukufutheka kwami phezu kwenu. ²³ Izwi likaJehova lafika kimi, lathi: ²⁴ Ndodana yomuntu , yisho kuwo ukuthi : U yizwe elingahlanjululwanga, elinganelwanga ngosuku lokufutheka. ²⁵ Kukhona uzungu lwabaprofethi bawo phakathi kwawo njengengonyama ebhongayo edwengula impango ; badlile imiphefumulo , bathatha ingcebo nokuyigugu; benzile abafelokazi babo babe baningi phakathi kwawo. ²⁶ Abapristi bawo badlovile umthetho wami ; bangcolisile izinto zami ezingcwele, abahlukanisanga okungcwele nokuyichilo, abafundisanga abantu ukwahlukanisa okungcolileyo nokuhlambulukileyo, bafihlele amasabatha ami amehlo abo; sengidumazekile phakathi kwabo. ²⁷ Izikhulu zawo phakathi kwawo zinjengezimpisi ezidwengula impango ukuchitha igazi nokuqeda imiphefumulo ukuba ziphange nokuphanga. ²⁸ Abaprofethi bawo babanamekele ngodaka olungavuthiwe, bebona okuyize, bebabhulela amanga , bethi: Isho kanje iNkosi uJehova , noma uJehova engakhulumanga. ²⁹ Abantu bezwe bacindezele nokucindezela , baphangile nokuphanga , yebo, bakhathazile abampofu nabaswelayo , bacindezele abafokazi ngokungengamthetho. ³⁰ Ngafuna kubo umuntu wokubiya uthango , eme esikhaleni ngaphambi kwami ngenxa yezwe ukuba ngingalichithi, kepha angimfumananga. ³¹ Ngase ngithulula ukufutheka kwami phezu kwabo ; ngibaqedile ngomlilo wentukuthelo yami, ngehlisela indlela yabo phezu kwama khanda abo, isho iNkosi uJehova.