¹ Ngiqinisile, ngiqinisile ngithi kini: Ongangeni ngesango esibayeni sezimvu , kodwa ekhwela ngenye indawo, lowo uyisela nomphangi. ² Kepha ongena ngesango ungumalusi wezimvu. ³ Umlindisango uyamvulela lowo ; nezimvu ziyalizwa izwi lakhe ; ubiza ezakhe izimvu ngamagama, aziholele phandle. ⁴ Nxa esezikhiphile ezakhe zonke, uhamba phambi kwazo, izimvu zimlandele, ngokuba zilazi izwi lakhe. ⁵ Kepha umfokazi azisoze zamlandela , kodwa ziyakumbalekela , ngokuba zingalazi izwi labafokazi. ⁶ UJesu washo lo mfanekiso kubo ; kepha bona abezwisisanga ukuba kuyini lokho akukhuluma kubo. ⁷ Ngakho-ke uJesu wabuye wathi kubo : Ngiqinisile, ngiqinisile ngithi kini : Mina ngiyisango lezimvu. ⁸ Bonke abafike ngaphambi kwami bangamasela nabaphangi , kepha izimvu azibezwanga. ⁹ Mina ngiyisango ; uma umuntu engena ngami , uyakusindiswa, angene, aphume, afumane idlelo. ¹⁰ Isela kalizi kungengokweba nokubulala nokubhubhisa ; mina ngize ukuba babe nokuphila, babe nakho kuchichime. ¹¹ Ngingumalusi omuhle . Umalusi omuhle udela ukuphila kwakhe ngenxa yezimvu. ¹² Okhokhelwayo engesiye umalusi , izimvu zingesizo ezakhe , ebona impisi iza, ushiya izimvu, abaleke -- impisi izibhozomele, izihlakaze -- ¹³ ngokuba engokhokhelwayo, engazinakekeli izimvu. ¹⁴ Mina ngingumalusi omuhle; ngiyazazi ezami, nezami ziyangazi, ¹⁵ njengalokhu uBaba uyangazi , nami ngiyamazi uBaba ; ngidela ukuphila kwami ngenxa yezimvu. ¹⁶ Nezinye izimvu nginazo ezingesizo ezalesi sibaya ; nalezo ngimelwe ukuziletha; ziyakuzwa izwi lami, kube mhlambi munye nomalusi munye. ¹⁷ Ngalokho uBaba uyangithand a, ngokuba ngidela ukuphila kwami ukuba ngibuye ngikuthabathe. ¹⁸ Akakho ongangamuka ukuphila kwami , kodwa ngikudela ngokwami ; nginamandla okukudela , nginamandla okubuye ngikuthabathe . Lo myalo ngiwamukele kuBaba. ¹⁹ Kwaba khona futhi ukwahlukana phakathi kwabaJuda ngalawo mazwi. ²⁰ Abaningi kubo bathi: Unedemoni, uyahlanya; nimlalelelani na? ²¹ Abanye bathi: Lawo mazwi akusiwo awomuntu onedemoni; imbala idemoni lingavula amehlo ezimpumputhe na? UJesu unguMesiya ²² Khona kwakungumkhosi wokuhlanjululwa kwethem peli eJerusalema , kusebusika. ²³ UJesu wayehamba ethempelini emphemeni kaSolomoni. ²⁴ Base bemhaqa abaJuda bethi kuye : Koze kube nini ulibazisa izinhliziyo zethu na? Uma wena unguKristu, sitshele ngokuchachileyo. ²⁵ UJesu wabaphendula wathi: Nganitshela, kodwa anikholwanga; imisebenzi engiyenzayo egameni likaBaba yiyona efakaza ngami. ²⁶ Kodwa nina anikholwa, ngokuba anisibo abezimvu zami. ²⁷ Izimvu zami ziyalizwa izwi lami; nami ngiyazazi, ziyangilandela; ²⁸ ngizinika ukuphila okuphakade , azisoze zabhubha na phakade; akakho ongazihlwitha esandleni sami. ²⁹ UBaba onginikileyo mkhulu kunabo bonke ; akakho ongazihlwitha esandleni sikaBaba. ³⁰ Mina noBaba simunye. ³¹ AbaJuda base bebuye bethatha amatshe ukuba bamkhande. ³² UJesu wabaphendula wathi : Nginitshengise im isebenzi eminingi emihle evela kuBaba; yimuphi umsebenzi kulena eningikhandela wona na? ³³ Bamphendula abaJuda , bathi: Asikukhandi ngenxa yomsebenzi omuhle kepha ngenxa yokuhlambalaza , ngokuba wena ungumuntu ozenza uNkulunkulu. ³⁴ UJesu wabaphendula wathi: Akulotshiwe yini emthethweni wakini ukuthi : Ngithe: Ningonkulunkulu, na? ³⁵ Uma wathi bangonkulunkulu bona eleza kubo izwi likaNkulunkulu -- nombhalo ungeqiwe -- ³⁶ nithi ngaye uYise amahlukanisileyo , wamthumela ezweni , ukuba uyahlambalaza, ngokuba ngithe: NgiyiNdodana kaNkulunkulu, na? ³⁷ Uma ngingenzi imisebenzi kaBaba, maningakholwa yimi. ³⁸ Kepha uma ngiyenza , nakuba ningakholwa yimi , kholwani yimisebenzi , ukuze nazi, niqonde ukuthi uBaba ukimi, nami ngikuBaba. ³⁹ Base befuna futhi ukumbamba, kepha waphunyuka esandleni sabo. ⁴⁰ Waphinda wamuka , waya phesheya kweJordani kuleyo ndawo lapho uJohane waqala ukubhapathiza khona, wahlala lapho. ⁴¹ Nabaningi beza kuye , bathi: UJohane nempela akenzanga sibonakaliso nasinye, kepha konke uJohane akusho ngalowo muntu kwakuqinisile. ⁴² Abaningi bakholwa nguye lapho.