¹ Bazalwane, ukulangazela kwenhliziyo yami nokunxusa kwami kuNkulunkulu ngabo kungukuba basindiswe. ² Ngokuba ngiyabafakazela ukuthi bashisekela uNkulunkulu kodwa kungengokuqonda; ³ ngokuba bengakwazi ukulunga kukaNkulunkulu , befuna ukumisa okwabo , abakuthobelanga ukulunga kukaNkulunkulu. ⁴ Ngokuba isiphetho somthetho nguKristu , kube ngukulunga kubo bonke abakholwayo. ⁵ Ngokuba uMose uloba ukuthi umuntu owenza ukulunga okuvela emthethweni uyakuphila ngakho. ⁶ Kepha ukulunga okuvela ngokukholwa kusho kuthi : Ungasho enhliziyweni yakho ukuthi: Ngubani ozakwenyukela ezulwini na ? okungukuthi ukwehlisa uKristu, ⁷ nokuba: Ngubani ozakwehlela kwalasha na ? okungukuthi ukukhuphula uKristu kwabafileyo. ⁸ Kepha kuthini na ? Izwi liseduze nawe , emlonyeni wakho nasenhliziyweni yakho, okungukuthi izwi lokukholwa esilishumayelayo. ⁹ Ngokuba uma uvuma ngomlomo wakho ukuthi uJesu uyiNkosi , ukholwa enhliziyweni yakho ukuthi uNkulunkulu wamvusa kwabafileyo , uyakusindiswa; ¹⁰ ngokuba umuntu ukholwa ngenhliziyo kube ngukulunga , ngomlomo uyavuma kube ngukusindiswa. ¹¹ Ngokuba umbhalo uthi: Lowo okholwayo akayikujabhiswa. ¹² Ngokuba akukho mahluko phakathi komJuda nomGreki , lokhu yena uyiNkosi yabo bonke, ubacebele bonke abakhuleka kuye, ¹³ ngokuba bonke abayakukhuleka egameni leNkosi bayakusindiswa. ¹⁴ Kepha bayakukhuleka kanjani kuye abangakholwanga nguye na ? Bayakukholwa kanjani abangezwanga ngaye na ? Bayakuzwa kanjani , kungekho oshumayelayo na? ¹⁵ Bayakushumayela kanjani , uma bengathunywa na ? Njengokulotshiweyo ukuthi: Yeka, zinhle izinyawo zabashumayela izindaba ezinhle. ¹⁶ Kodwa abalilalelanga bonke ivangeli . Ngokuba u -Isaya uthi : Nkosi, ngubani owakholwa ngesikuzwileyo na? ¹⁷ Ngalokho-ke ukukholwa kuvela ngokuzwa , ukuzwa kuvela ngezwi likaKristu. ¹⁸ Kepha ngithi : Abezwanga yini na ? Yebo, impela: Izwi labo liphumele emhlabeni wonke, nokusho kwabo kuye nasemikhawulweni yelakhiweyo. ¹⁹ Kepha ngithi : U-Israyeli wayengaqondi na ? Kuqala, uMose uthi : Mina ngiyakunivusela umhawu ngabangesiso isizwe , nginithukuthelise ngesizwe esingenangqondo. ²⁰ Kepha u-Isaya unesibindi sokuthi: Ngafunyanwa yilabo abangangifunanga, ngabonakala kulabo abangangibuzanga. ²¹ Kodwa ngo -Israyeli uthi: Usuku lonke ngelulela izandla zam i kuso isizwe esingalaleliyo nesiphikayo.