¹ Ngokuba ngiyathanda ukuba nazi ukuthi kukhulu kangaka nani ukulwa enginakho ngenxa yenu nabaseLawodikeya nabo bonke abangabonanga ubuso bami ngamehlo, ² ukuze izinhliziyo zabo ziduduzwe , behlanganisiwe othandweni babe nengcebo yonke yokwazi okuphelele , bazisise imfihlakalo kaNkulunkulu enguKristu, ³ okufihlwe kuye amagugu onke okuhlakanipha nowokwazi. ⁴ Ngikusho lokhu, ukuze kungabikho muntu onikhohlisa ngamazwi okuyenga. ⁵ Ngokuba noma ngingekho ngomzimba , nokho ngikhona kini ngomoya ngithokoza, ngibona inhlelo yenu nokuqina kokukholwa kwenu kuKristu. ⁶ Ngakho-ke njengalokho nimamukele uKristu Jesu iNkosi, hambani nikuye, ⁷ nigxilile, nakhiwe kuye, niqinisiwe ekukholweni, njengalokho nifundisiwe, nivame ukubonga. ⁸ Xwayani funa kube khona onithumbayo ngokuhlakanipha nangenkohliso eyize njengokwemvelo yabantu , njengezifundiso zokucathula kwezwe , kungenjengokukaKristu. KuKristu kukhona konke ukuphelela kukaNkulunkulu ⁹ Ngokuba kuhlala kuye ngokomzimba ukugcwala konke kobuNkulunkulu; ¹⁰ nigcwalisiwe kuye, yena oyinhloko yemibuso yonke namandla, ¹¹ enasokela kuye f uthi ngokusoka okungenziwanga ngezandla ngokukhumula umzimba wenyama, ngokusoka kukaKristu; ¹² nimbelwe kanye naye ngombhapathizo , okungawo futhi navuswa kanye naye ngokukholwa ngamandla kaNkulunkulu owamvusa kwabafileyo. ¹³ Nani-ke ebenifile ngeziphambeko nangokungasoki kwenyama yenu wanenza nibe ngabaphilayo kanye naye esithethelela zonke izono zethu; ¹⁴ esehlangule incwadi yecala lethu , emelana nathi ngemiyalo yayo , wayeyisusa ngokuyibethela esiphambanweni; ¹⁵ ebaphucile ababusi nabanamandla izikhali waba thela ngehlazo obala , ebanqoba ngaso. Ukuxwayisa ngezifundiso zamanga ¹⁶ Ngakho makungabikho muntu onilahla ngokudla nesiphuzo , noma ngemikhosi, noma ukwethwasa kwenyanga, noma amasabatha, ¹⁷ okuyisithunzi nje salokhu obekuzakuza; kepha umzimba ngokaKristu. ¹⁸ Makungabikho muntu onamuka umvuzo wenu, othanda ukuzenza othobile ekhonza izingelosi , ephike ngemibono yakhe , ezikhukhumeza ngeze ngengqondo yakhe yenyama, ¹⁹ engabambeleli kuye oyinhloko , okungaye umzimba wonke usizwa , uhlanganiswa ngamalungu nemisipha, ukhula ngokukhula kukaNkulunkulu. ²⁰ Uma nifile kanye noKristu nakhululwa ezifundisweni zokucathula kwezwe, yini ukuba okungathi nisaphila ngokwezwe nithobele izifundiso zokuthi: ²¹ Ungaphathi, ungezwa ngolimi, ungathinti, ²² okuphela konke ngokudliwa ngokweziyalezo nezifundiso zabantu ²³ ezinegama lokuhlakanipha kambe ngokuzikhethela inkonzo , nangokuzithoba, nangokuhlupha umzimba ; akusizi lutho maqondana nokuzithiba kwenyama.