¹ Mbonge uJehova , mphefumulo wami ; konke okuphakathi kwami makubonge igama lakhe elingcwele. ² Mbonge uJehova, mphefumulo wami, ungakhohlwa imisebenzi yonke yakhe yomusa, ³ yena othethelela zonke izono zakho, owelapha zonke izifo zakho; ⁴ okhulula ukuphila kwakho ekubhujisweni , okuqhelisa ngomusa nangobubele; ⁵ osuthisa ukulangazela kwakho ngokuhle , ubusha bakho bubuyiswe njengokhozi. ⁶ UJehova ubenzela bonke abacindezelwayo ukulunga nokwahlulela. ⁷ Wamazisa uMose izindlela zakhe, nabantwana bakwa-Israyeli izenzo zakhe. ⁸ UJehova unobubele nesihawu; wephuza ukuthukuthela, kuvama umusa. ⁹ Akathethi njalonjalo; akagcini intukuthelo yakhe kuze kube phakade. ¹⁰ Akasiphathi njengokufanele izono zethu, akasivuzi njengokwamacala ethu. ¹¹ Ngokuba njengokuphakama kwezulu phezu komhlaba unjalo umusa wakhe phezu kwabamesabayo. ¹² Njengokuba impumalanga yahlukene nentshonalanga , udedisile kangaka kithi iziphambeko zethu. ¹³ Njengoyise ehawukela abantwana bakhe , kanjalo uJehova uyabahawukela abamesabayo. ¹⁴ Ngokuba uyakwazi ukubunjwa kwethu; uyakhumbula ukuthi siluthuli. ¹⁵ Izinsuku zomuntu zinjengotshani; uyakhahlela njengembali yasendle. ¹⁶ Ngokuba umoya uyadlula phezu kwayo , bese yinyamalala, nendawo yayo ingabe isayazi. ¹⁷ Kepha umusa kaJehova uphezu kwabamesabayo kwaphakade kuze kube phakade, nokulunga kwakhe kubantwana babantwana, ¹⁸ kubo abagcina isivumelwano sakh e bekhumbula iziyalezo zakhe ukuba bazenze. ¹⁹ UJehova umisile isihlalo sakhe sobukhosi ezulwini ; nombuso wakhe ubusa phezu kwakho konke. ²⁰ Bongani uJehova nina zingelosi zakhe , nina maqhawe anamandla enenza okwezwi lakhe nilalela ukukhuluma kwezwi lakhe. ²¹ Bongani uJehova nina mabandla onke akhe , nina zinceku zakhe enenza intando yakhe. ²² Bongani uJehova nina misebenzi yakhe yonk e ezindaweni zonke zombuso wakhe. Mbonge uJehova, mphefumulo wami.